ក្របសៀវភៅមហាសង្ក្រានសំរាប់ឆ្នាំថ្មីរំលេចដោយការហែក្បួនបុត្រីកបិលមហាព្រហ្ម
ដែលរៀបរៀងដោយលោក អ៊ឹម បូរិន្ទ
រណ្តាប់ទទួលទេវតាឆ្នាំកុរ នព្វស័កថ្ងៃចូលមហាសង្ក្រាន្ត
ព្រះពុទ្ធសករាជព្រះសាសនា អតិកន្តា កន្លងទៅហើយបាន ២៥៥០ ត្រឹមថ្ងៃ ១៥កើត ខែពិសាខ លុះដល់ថ្ងៃ ១រោច ខែពិសាខ ឆ្នាំកុរ នព្វស័កតទៅចូលពុទ្ធសករាជ ២៥៥១។
នឹងគណនាឆ្នាំកុរ ឥឡូវនេះ សង្ក្រាន្តចូលមកនៅថ្ងៃសៅរ៍ ១២រោច ខែចេត្រ ត្រូវនឹង ថ្ងៃទី១៤ ខែមេសា គ.ស២០០៧ វេលាម៉ោង១២និង៤៨នាទី ។ ពេលនោះព្រះអាទិត្យចេញពីមីនរាសី ទៅឋិតនៅឯ មេសរាសីតាមផ្លូវគោវិថីគឺផ្លូវកណ្តាល ទើបមានទេពធីតាមួយព្រះអង្គជាមគ្គនាយិកាព្រះនាមមហោធរទេវី ជាបុត្រីទី៧ នៃកបិលមហាព្រហ្ម គង់នៅចាតុម្មហារាជិកាទ្រង់អម្ពរពណ៌ខៀវ លម្អនៅព្រះកាណ៌ដោយ ផ្កាកណីកា អភរណៈ ទ្រង់ពាក់កែវនិលរតន៍ ភក្សាហារ ទ្រង់សោយសាច់ទ្រាយ ព្រះហស្ថស្តាំ ទ្រង់កងចក្រ ព្រះហត្ថឆ្វេង ទ្រង់ត្រីសូល៍ ទ្រង់គង់ពាក់ឆៀងបើកព្រះនេត្រលើខ្នងមយូរា (សត្វក្ងោក) ជា ពាហនៈ ។ ទើបនាំអស់ទេវបុត្រ ទេវធីតាទាំងមួយសែនកោដិហោះទៅកាន់គុហារកែវ ធម្មមាលី នាទីភ្នំកៃលាស ខេត្ត ហេមពាន្ត ជាទីតំកល់ទុកនូវព្រះសិរសាកបិលមហាព្រហ្ម ដែលតំកល់លើពានមាស នាំមកដង្ហែប្រទក្សិណ ភ្នំព្រះសុមេរុរាជតាមផ្លូវព្រះអាទិត្យចរចំនួន៦០នាទី ទើបនាំយកទៅតម្កល់ទុកកន្លែងដើមវិញ ហើយប្រជុំ ទេវបុត្រ ទេវធីតាទាំងមួយសែនកោដិ ចូលទៅស្រង់ទឹកអនោតត្តមហាស្រះ ដែលមានទឹកហូរចេញពីបំពង់ ថ្មកែវ ដែលជាមាត់គោឧសភរាជទាំង៧ ត្រជាក់ក្សេមក្សាន្តព្រះរាជហប្ញទ័យ ហើយនាំគ្នាចូលទៅ សមាទានរក្សាសីល ដោយសោមនស្សរីករាយគ្រប់ព្រះអង្គ ក្នុងភគវតីសភាសាលា ដែលវិស្សកម្ម ទេវបុត្រនិមិត្តថ្វាយដើម្បីបន្ទោបង់អពមង្គលឱ្យជ្រះស្រឡះ ហើយចម្រើននូវសិរីសួស្តីជ័យមង្គលជន្មាយុ យឺនយូរដល់ទេវតានិងមនុស្សសត្វផងទាំងឡាយ តាំងពីឆ្នាំថ្មីចូលមកនេះ បានធូរទូលំទូលាយ សុខក្សេមក្សាន្តតរៀងទៅ ។ ថ្ងៃសៅរ៍ ១២រោច ខែចេត្រ ត្រូវនឹង ថ្ងៃទី១៤ ខែមេសា គ្រិស្តសករាជ ២០០៧ វេលាម៉ោង១២ និង៤៨នាទី ជាថ្ងៃចូលឆ្នាំកុរ នព្វស័ក ។ ថ្ងៃអាទិត្យ ១៣រោច ខែចេត្រ ត្រូវនឹងថ្ងៃទី១៥ ខែមេសា គ្រិស្តករាជ ២០០៧ ជាវារៈវន័បត ។ ថ្ងៃចន្ទ ១៤រោច ខែចេត្រ ត្រូវនឹង ថ្ងៃទី១៦ ខែមេសា គ្រិស្តសករាជ ២០០៧ នៅវេលាម៉ោង១៦ និង ៤០នាទី ៤៨វិនាទី ជាវារៈឡើងស័ក គម្រប់ជាសង្ក្រាន្តបីថ្ងៃ ស្រេចបរិបូណ៌ ចូលជាសកល ឆ្នាំកុរ នព្វស័ក ចុល្លសករាជ១៣៦៩តទៅ។ក្នុងឱកាសសង្ក្រាន្តទាំងបីថ្ងៃ សូមអស់ប្រជាពលរដ្ឋប្រុស–ស្រីផងទាំងឡាយរៀបចំពលិការគ្រឿង សក្ការបូជា អុជប្រទីបជ្វាលា ថ្វាយព្រះរតនត្រ័យ និងទទួលស្វាគមន៍ទេវបុត្រទេវធីតាឆ្នាំថ្មី ហើយខំ លះបង់ចិត្តអាក្រក់អន្សតិរ្ថីយជាចិត្តអប្រីយ៍ ជាប់ដោយគំនុំគំកួនព្យាបាទឈ្នានីស ដែលកើតមានក្នុង ឆ្នាំចាស់ ឱ្យស្រឡះតាំងចិត្តប្រព្រឹត្តល្អប្រកបដោយមេត្តា ករុណា មុទិតា ឧបេក្ខា និងបញ្ញា ធ្វើបុណ្យទាន តាមប្រពៃណីរក្សាសីលប្រាំឱ្យបានជាប់ជានិច្ច នោះទើបទេវតានឹងឱ្យពរ សព្ទសាធុការ លោកអ្នកនឹង មានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មី នេះតរៀងទៅ ។
រណ្ដាប់ទទួលទេវតា
រណ្តាប់ទទួលទេវតា តាមទំនៀមពីបុរាណរៀងរហូតមក មានរានទទួលទេវតាមួយសម្រាប់ តាំងគ្រឿង ពលីការផ្សេងៗ។ ត្រូវរៀបចំសំពត់ពណ៌ស ហើយរៀបចំបាយសី៩ថ្នាក់មួយគូ បាយសី៧ថ្នាក់មួយគូ បាយសី៥ថ្នាក់មួយគូ បាយសី៣ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ ទៀន៥ ធូប៥ ផ្កាដាក់លើជើងពាន១គូ ចេកនួន ចេកណាំវ៉ាមួយគូ ផ្លែឈើ១១មុខ រៀបដាក់ជើងពានជាគូៗ ដូងឡៅមួយគូ។ នៅក្នុងឆ្នាំថ្មីនេះគួរដាក់បង្អែមនិងចំអាប១ថាស សម្រាប់ទេវតាផង ។ ចំពោះបាលី៩ថ្នាក់ ៧ថ្នាក់ សម្រាប់នៅព្រះបរមរាជវាំង ចំណែកប្រជារាស្ត្រគួរធ្វើត្រឹម៥ថ្នាក់ចុះមកក៏ល្អដែរ។ ចំពោះផ្លែឈើ សម្រាប់ប្រជារាស្ត្រ គួររៀបឱ្យបានត្រឹម៣ ឬ៥មុខជាការប្រសើរ តែបើសម្បូរបានដល់១១មុខ ក៏រឹតតែ ប្រសើរ ។
ទំនាយប្រចាំឆ្នាំ
កេណ្ឌព្រះភិរុណសាស្ត្រ ឆ្នាំនេះ ភពព្រះសៅរ៍ ជាអធិបតី នាំផ្លូវទៅសុំទឹកភ្លៀង ពីស្តេចនាគ ហើយនាគ៥ បង្អុរទឹកភ្លៀង ៤០០មេ ដែលចែកចេញជាៈ
–ចក្រវាល ១៦០មេ
–ព្រៃហេមពាន្ត ១២០មេ
–មហាសមុទ្រ ៨០មេ
–និងជម្ពូទ្វីបមនុស្សលោកយើងមានចំនួន៤០មេ ដើមឆ្នាំភ្លៀងល្អ កណ្តាលឆ្នាំភ្លៀងតិច និងចុងឆ្នាំ ភ្លៀងច្រើន ។
កេណ្ឌធារានិគុណ ឆ្នាំនេះត្រូវតេជោធាតុចុះ ភ្លើងកាចសាហាវជាងឆ្នាំចាស់។ កំរិត១៦,១៦ គឺមាន សំណល់(០) ច្រើនជាងឆ្នាំទាំងពួង ។
កេណ្ឌធុញ្ញារៈ ឈ្មោះវិបត្តិទំនាយថា ស្រូវសំណាប ស្រែចំការនឹងកើតកិមិជាតិ (ដង្កូវក្រាដង្កូវដួង មេអំបៅសត្វល្អិត) ស៊ីបំផ្លាញផល្លានុផល ផលដំណាំបានតែពាក់កណ្តាលខូចអស់ពាក់កណ្តាល ស្រុកទេស នឹងកើតកលិយុគ យុទ្ធសង្គ្រាម ប្រហារជីវិតគ្នាឥតខ្លាចស្លាប់ និរាស្ត្រប្រាសចាកគ្នាជាច្រើន លើកច្រើន សា។
ទំនាយការធ្វើស្រែ ឆ្នាំនេះទឹកភ្លៀងអំណាយផលនៅដើម និងចុងឆ្នាំ ដូច្នេះការធ្វើស្រែទំនាបបានផលល្អ ឯ ស្រែខ្ពស់បានទទួលផលល្មមសមគួរ ។
កេណ្ឌព្រឹក្សា ឆ្នាំនេះត្រូវដើមប្ញស្សី ជាស្តេចទំនាយថា ៖ មនុស្សផងទាំងឡាយ នឹងមានរោគព្យាធិ ជំងឺតម្កាត់ នាំឱ្យបាត់បង់ជីវិតជាច្រើន ។
កេណ្ឌព្រះអាទិត្យ ឆ្នាំនេះព្រះអាទិត្យធ្វើដំណើរទៅដោយជិះនាគរាជទំនាយថា ៖ មនុស្សផង ទាំងឡាយនឹងត្រូវអត់បាយ មានសេចក្តីខ្លាច និងមរណភាព (ភ័យព្រោះសេចក្តីស្លាប់) ។
ទំនាយតាមថ្ងៃសង្ក្រាន្ត ទំនាយថ្ងៃមហាសង្ក្រាន្ត ថ្ងៃចូលឆ្នាំត្រូវ នឹងថ្ងៃសៅរ៍ ជាថ្ងៃចូលឆ្នាំទី១ ទំនាយថា ៖ ឆ្នាំនេះ នឹងបណ្តាល ហេតុឱ្យមានអន្តរាយកើតឡើងនៅកណ្តាលទីក្រុង កណ្តាលប្រទេស ពុំនោះសោតនឹងមានភ្លើងសាហាវ ចោរព្រៃ ចិត្តកាច និងមានជំងឺតម្កាត់ធ្ងន់ធ្ងរជាទីបំផុត។ ដែនដីនឹងស្ងួតហួតហែង មនុស្សទាំងឡាយ ឈឺថ្កាត់ស្លាប់ ទឹកនឹងមិនប្រណី ក្រពើនឹងខាំស៊ីមនុស្សគ្រប់តំបន់ មនុស្សទាំងឡាយនឹងកើតទុក្ខក្តៅ ក្រហាយក្នុងចិត្ត កើតចោរ ឃ្មួយ មនុស្សអាក្រក់ នឹងកើតកលិយុគព្រោះអ្នកធំ ហើយសត្វព្រៃ នឹងស្លាប់ច្រើនជាអនេក។ សត្វស្វាខ្មៅ ស្វាត្រោសនឹងឈឺស្លាប់ច្រើន។ មនុស្សនឹងកើតពិសដំបៅដ៏កាច សាហាវក្នុងដែនដី ។ រន្ទះនឹងមានច្រើន កណ្តុរនឹងកាត់ស្រូវ គឺកើតទុក្ខគួរឱ្យខ្លាចរហូត ដល់ចុងឆ្នាំ ។
ទំនាយថ្ងៃវារៈវ័នបភ ថ្ងៃកណ្តាល ត្រូវនឹងថ្ងៃអាទិត្យទំនាយថា ៖ ឆ្នាំនេះធ្វើស្រែ មិនសូវបានផល ព្រោះភ្លៀងមិនសូវធ្លាក់ដើម ស្រូវនឹងងាប់ខ្ទេចខ្ទី ហើយបានឮភាសាផ្សេង (បរទេស ចូលស្រុក) ព្រះមហាក្សត្រនឹងក្តៅក្រហាយចិត្ត ។
ទំនាយថ្ងៃឡើងស័ក ថ្ងៃសង្ក្រាន្តចុងក្រោយត្រូវនឹងថ្ងៃចន្ទទំនាយថា ៖ ឆ្នាំនោះ ព្រះរាជទេពី និងពពួកនាង អ្នកស្នំបរិវាប្រកបដោយសេចក្តីសុខ និងព្រមដោយសម្បត្តិទាំងពួង ។
ខ្មែរជួយខ្មែរ 
បញ្ចេញមតិ